سكينة العلمي بكلمات يحفها الحنين والإشتياق، تقاسم الفنان المغربي، زكرياء بناخي، الملقب بـ”البنج”، مشاعره مع متابعيه عقب مرور تسع سنوات على فقدان والدته، عبر صفحته الرسمية بمنصة “إنستغرام”.
ونشر زكرياء صورة قديمة لوالدته، بالأبيض والأسود، مرفقة بتدوينة مؤثرة، مفادها: “اليوم مرت تسع سنوات على فقدان إنسانة وهبتني الحياة، وعطاتها طعم رغم جميع العراقيل والمشاكل، إنسانة منقدرش نوصف التضحيات لي دارتهم على قبلي وعلى قبل بزاف ديال الناس، والمقابل كان هو تسهيل حياتي وحياة الآخرين، إنسانة اللي على قبلها صبروا عليا بزاف ديال الناس واخا تماديت معاهم في الغلط حيث الخير ديالها كان غالب على الشر ديالي مع الآخرين، إنسانة ماكانتش كاتسولني مالي ولا أش بيا ولا أش خاصني كانت كاتعرف كلشي من عيني بلام ندوي”.
مضيفا: “بصح الدنيا تعطي وتاخد وكلشي كايتعوض، وأنا خسرت بيما فيه الكفاية والحمد لله، مانتعرضش على قضاء الله ولكن فاطمة منها وحدة في الكون، مشات وماغاتوليش، تسع سنوات أخوتي دوزت فيها الفقر، الفلوس، العز، الغدر، والخير اللي رجع شر، كان بإمكاني نكون إنسان فاشل ونمشي مع الموجة، ولكن لا ثم لا، حرام نضيع مجهود أعظم وأطهر وأطيب إنسانة في العالم، اللي كان هدفها في الحياة غير كلشي يكون مزيان”.
مسترسلا: “عرفت بزاف ديال الناس الزوينين وحتى الخايبين، واللي شاط منهم هو تجارب ضروني، وذكريات كيفرحوني مرة مرة، كانكتب هادشي وربي لي عالم بيا، حيث لحد الآن مازال كنكذب مرة مرة على راسي وكنقول ماما مسافرة ودابا ترجع شي نهار، ودازت تسع سنوات ومازال ما رجعاتش، الواقع هو أنه دموعي في عيني وبصح دموع الرجال تحرك الجبال ولكن ماتسواش ابتسامة من ماما”.
ووجه رسالة إلى متابعيه، يوصيهم بالأم، قائلا: “الحاصول لي باقة الأم ديالو في الحياة اتهلا فيها بزاف واللي بحالي ليه الله، بغيت أكبر عدد من الرحمات ليها ولكل المسلمين، حياكم الله أ خوتي”.
وتفاعل رواد مواقع التواصل الاجتماعي مع التدوينة، معبرين عن تعاطفهم وتأثرهم، داعين لوالدته بالرحمة والمغفرة.
يذكر أن “البنج” أعلن قبل أيام عن استعداده لطرح أغنية جديدة عبر صفحته الرسمية بمنصة “إنستغرام”، حيث شارك مجموعة من صوره مرفقة بتعليق جاء فيه: “الأغنية القادمة، سبابو أنتي”.
